Այսօրվա դրությամբ Վրաստանի նախագահական ընտրությունների հիմնական առաջատարը «Վրացական երազանք» կոալիցիայի թեկնածու, փոխվարչապետ եւ կրթության նախարար Գեորգի Մարգվելաշվիլին է: Այս մասին այսօր՝ հունիսի 14-ի մամուլի ասուլիսում Մեր թղթակցի հարցին ի պատասխան նշել է փորձագետ Ջոնի Մելիքյանը: 

«Վրաստանի նախագահի պաշտոնին հավակնող Նինո Բուրջանաձեն արդեն սկսել է  նախընտրական քարոզարշավը: Հուլիսի կեսերին պարզ կդառնա, թե ում է առաջադրելու «Միասնական ազգային շարժում» կուսակցությունը, թեեւ,  ըստ սոցհարցումների,  այդ քաղաքական ուժն արդեն սատարում  չունի», - նշել է փորձագետը, ընդգծելով, որ «Վրացական երազանք» կոալիցիայի վարկանիշը հասնում է մոտավորապես 80%-ի: Ըստ Ջոնի Մելիքյանի՝ դա նշանակում է, որ անկախ առաջադրված անձից, իշխող կոալիցիայի թեկնածուն հոկտեմբերին կդառնա Վրաստանի նախագահ: 

«Հունիս-հուլիս ամիսներին, իհարկե, կառաջադրվեն նոր թեկնածուներ, սակայն պարզ է, որ կհաղթի «Վրացական երազանքի»  թեկնածուն», - եզրակացրել է Ջոնի Մելիքյանը:

Նշենք, որ Վրաստանում հերթական նախագահական ընտրությունները տեղի են ունենալու այս տարվա հոկտեմբերին: Ըստ Սահմանադրության համապատասխան փոփոխությունների՝ նախագահի երդմնակալությունից հետո երկրում իրական իշխանությունն անցնելու է խորհրդարանին եւ կառավարությանը: