Ազգային ժողովի կանոնակարգի համաձայն՝ քառօրյա նիստերի երրորդ օրը կառավարության հետ հարցուպատասխանի օրն է։

ՀԱԿ խմբակցության քարտուղար Արամ Մանուկյանը հարց ուղղեց վարչապետ Տիգրան Սարգսյանին. «Ե՞րբ է ստորագրվել գազի գնի բարձրացման պայմանագիրը, ո՞վ է սոտրագրել, և այդ պայմանագրերը պատգամավորներին հասուն են, թե՝ ոչ։ Ես կարո՞ղ եմ այդ պայմանագրի տեքստին ծանոթանալ»։

Հարցին պատասխանեց Էներգետիկայի և բնական պաշարների նախարար Արմեն Մովսիսյանը։ «Թե երբ է ստորագրվել, դա չեմ կարող հիշողությամբ ասել, հանկարծ չսխալվեմ։ Ինչ վերաբերում է պայմանագրի տեքստին ծանոթանալուն, ապա, բացի կոմերցիոն բնույթ պարունակող մասից, մյուս մասը կարող ենք բացել և տալ ձեզ»։

Արամ Մանուկյանը, արձագանքելով նախարարի պատասխանին, ասաց. «Գոնե ամիսը խնդրում եմ հիշեք, ե՞րբ է ստորագրվել։ Ա՞յս տարի, թե՞ անցյալ տարի»։

«Չեմ հիշում, հիմա կճշտեմ, կասեմ։ Հիմա ասեմ, կասեք՝ մի ամիս շուտ ա ասում, մի ամիս ուշ»,-ասաց Մովսիսյանը։

ՀԱԿ պատգամավորը ներկայացրեց հարցի ենթատեքստը. «Ենթատեքստը հետևյալն է, 2 օրվա հետ պետք է համեմատել, մեկը՝ մարտի 10-ի Սերժ Սարգսյանի հայտարարության, երբ ինքը հերյուրանք համարեց ապրիլի 10-ից թանկացած գնով գազ առնելու մասին տեղեկությունը, երկրորդը՝ փետրվարի 18-ի ընտրությունների հետ։ Դրա համար դուք չեք ասում՝ դա եղել է այդ ժամկետից առաջ, թե՝ այդ ժամկետից հետո»,-ասաց Մանուկյանը։

Էներգետիկայի և բնական պաշարների նախարարն ասաց. «Հաստատ եղել է դրանից ավելի ուշ, հետևաբար, կապել այդ գործընթացի հետ չի կարելի»։